Former Priest Sentenced for Sex Crimes Against Children
ᐃᔅᓯᕋᕐᔪᐊᓄᑦ ᐊᔪᕆᖅᓱᐃᔨᐅᖅᓯᒪᔪᖅ ᓇᓗᓇᐃᖅᑕᐅᓚᐅᖅᑐᖅ ᐃᖅᑲᖅᑐᐃᕕᒻᒥ ᖁᓄᔪᓐᓂᐊᖅᑐᒥᓂᐅᓂᖓᓐᓄᑦ ᓱᕈᓯᕐᓂᑦ
ᐃᖃᓗᐃᑦ (ᓄᓇᕗᑦ) - ᔮᓐᓄᐊᕆ 30, 2025 - ᐅᓪᓗᒥᐅᔪᖅ, ᓄᓇᕗᑦ ᐃᖅᑲᖅᑐᐃᔨᒃᑯᖏᓐᓂ, ᐃᐅᕆᒃ ᑎᐊᐃᒍ ᓇᓗᓇᐃᖅᑕᐅᖅᑲᐅᔪᖅ ᐱᖓᓲᔪᖅᑐᓄᑦ ᐅᑭᐅᓄᑦ ᐃᓚᒃᑲᓂᑦᑐᑎᑦ ᐊᓄᓪᓚᔅᓰᕕᒻᒦᓐᓂᐊᕐᓂᖓᓐᓂ ᖁᓄᔪᓐᓂᐊᖃᑦᑕᓚᐅᖅᓯᒪᓐᓂᖓᓐᓄᑦ 7−ᓂᒃ ᓱᕈᓯᕐᓂᑦ. ᐱᕋᔭᓐᓂᓚᐅᖅᓯᒪᔪᖅ ᐃᒡᓗᓕᒻᒥ ᒫᓐᓇᐅᓕᖅᑐᖅ ᓄᓇᕘᓂᕋᖅᑕᐅᓕᖅᑐᒥ, ᓄᓇᓕᓐᓂ ᐃᔅᓯᕋᕐᔪᐊᒃᑯᓐᓄ ᐊᔪᕆᖅᓯᐅᔨᐅᓚᐅᖅᓯᒪᔪᖅ, ᐊᑯᓐᓂᖏᓐᓂ 1978 ᐊᒻᒪᓗ 1982 ᐅᑭᐅᖏᓐᓂ.
ᔮᓐᓄᐊᕆᒥ 23, 2025, ᐃᔅᓯᕋᕐᔪᐊᒃᑯᓐᓄ ᐊᔪᕆᖅᓯᐅᓚᐅᖅᓯᒪᔪᖅ ᐸᓯᔭᔅᓴᐅᓂᕋᓚᐅᖅᓯᒪᔪᖅ 7−ᓄᑦ ᐃᖅᑲᖅᑐᕋᔅᓴᐅᓪᓗᓂ ᐱᕋᔭᑦᑐᒥᓂᐅᓪᓗᓂ ᐱᖁᔭᐃᑦ ᒪᓕᑦᑐᒋᑦ ᓈᓴᐅᑎᓕᒃ 149−ᒥᑦ ᐱᕋᔭᑦᑐᓕᕆᓂᕐᒧᑦ ᓇᓗᓇᐃᒃᑯᑕᐃᑦ. ᐱᖓᔪᐊᓐᓂᐅᓕᖅᑐᖅ ᑕᐃᒫᒃ ᐃᖅᑲᖅᑐᕋᔅᓴᓕᐊᕆᔭᐅᓯᒪᓕᖅᑐᖅ ᐊᒥᓱᓄᑦ ᐊᔾᔨᒌᓐᓄᑦ ᖁᓄᔪᓐᓂᐊᓂᕐᒧᑦ ᓱᕈᓯᕐᓂᑦ ᓄᓇᕗᒻᒦᓐᓂᖓᓐᓂ.
ᐱᓕᑉ ᐳᓘᑦ, ᐊᖏᔪᖅᑳᕆᔭᐅᔪᖅ ᒐᕙᑐᖃᒃᑯᓐᓂ ᑭᖕ ᑭᒡᒐᖅᑐᐃᔨᒃᑯᖏᓐᓄᑦ ᓄᓇᕗᒻᒥ, ᐃᒪᐃᓕᓚᐅᖅᑐᖅ:
“ᓇᓗᓇᐃᖅᑕᐅᒐᓗᐊᖅᑎᓪᓗᒍ ᐃᖅᑲᖅᑐᐃᕕᒻᒧᑦ ᐋᖅᑮᔾᔮᖏᑦᑐᑦ ᐋᓐᓂᖅᑕᐅᓯᒪᔪᓄᑦ ᐊᔅᓱᕐᔪᐊᕌᓗᒃ ᐱᑲᒻᒪᔅᓯᒪᔭᖏᓐᓄᑦ, ᐱᓗᐊᖅᑐᒥᑦ ᐅᑉᐱᕐᓇᕆᐊᖃᖅᑐᒥᑦ ᐱᓕᕆᔨᐊᓗᒻᒥ ᐊᑦᑐᐃᑲᒻᒪᔅᓯᒪᓪᓚᕆᑦᑐᖅ ᑕᐃᒃᑯᓂᖓ ᓇᒻᒥᓂᖅ ᓴᐳᒻᒥᒍᓐᓇᓐᖏᑦᑐᓂᒃ ᐃᓅᖃᑎᑦᑎᓐᓂ, ᓱᕈᓯᕐᓂᑦ. ᑭᓯᐊᓂᓕ, ᑕᐃᒃᑯᐊ ᐅᓂᒃᑳᕆᐊᖅᑐᕈᓐᓇᓚᐅᖅᑐᑦ ᓴᓐᖏᔪᐊᓗᐃᑦ ᑲᒪᒋᔭᐅᓚᐅᖅᓯᒪᔪᒥᓃᑦ ᐋᓐᓂᖅᑕᐅᓪᓗᑎᑦ ᑐᓴᖅᑕᐅᒋᐊᖃᕐᖓ ᓄᓇᓕᓐᓄᑦ, ᐱᓂᕐᓗᐃᔪᒥᓂᕐᒧᓪᓗ. ᖁᕕᐊᑉᐳᖓ ᑭᖕ ᑭᒡᒐᖅᑐᐃᔨᒃᑯᖏᑦ ᑲᓇᑕᒥ ᐊᒻᒪᓗ ᓄᓇᕗᒻᒥ ᖁᓄᔪᓐᓂᐊᓂᕐᒧᑦ ᐃᖅᑲᖅᑐᐃᕕᓕᕆᔩᑦ ᐊᒻᒪᓗ ᐅᕙᒍᑦ ᑭᖕ ᑭᒡᒐᖅᑐᐃᔨᒃᑯᖏᓐᓂ ᐃᑲᔪᖅᑎᖏᑦ, ᐊᒻᒪᓗ ᐊᑦᑐᖅᑕᐅᓯᒪᔪᓄᑦ ᐱᔨᑦᑎᕋᖅᑏᑦ, ᑕᐃᑲᓃᒍᓐᓇᓚᐅᕐᖓᑕ ᐃᑲᔪᖅᑐᐃᓪᓗᑎᓪᓗ ᑕᐃᒃᑯᓄᖓ ᐃᑲᔪᖅᑕᐅᔪᒪᔪᓄᑦ ᑐᓴᖅᑕᐅᔪᒪᔪᓄᓪᓗ.”
ᔪᐊᔾᔨ ᑐᕼᐊᐃ, ᐊᐅᓚᑦᑎᔨ ᑭᖕ ᑭᒡᒐᖅᑐᐃᔨᒃᑯᖏᓐᓄᑦ ᐅᖃᓚᐅᕐᒥᔪᖅ:
“ᐃᖅᑲᖅᑐᖅᑕᐅᒋᐊᖃᕐᖓᑦ ᑎᐊᐃᒍ ᖁᓄᔪᓐᓂᐊᖅᑐᒥᓂᐅᓂᖓᓐᓄᑦ ᐊᔭᐅᖅᑐᐃᑲᓐᓂᕐᒥᔪᑦ ᑐᓴᖅᑎᑦᑎᒋᐊᖃᕐᖓᑕ ᐱᓕᕆᔨᒻᒪᕆᓐᓂᑦ ᐅᑉᐱᕆᔭᐅᒋᐊᓖᑦ ᐱᑦᑎᐊᖃᑦᑕᖅᓯᒪᓂᖏᑦᑐᓂᑦᑕᐅ ᓴᖅᑭᒋᐊᖃᕐᒥᒻᒪᑕ. ᐅᑭᐅᒐᓴᕐᔪᐊᕌᓗᐃᑦ ᐊᓂᒍᖅᓯᒪᓕᖅᑑᒐᓗᐊᑦ, ᐱᕋᔭᑦᑐᓕᕆᔨᒃᑯᑦ ᑲᒪᒋᔭᐅᑦᑕᐅᑎᒋᓚᐅᖅᑐᑦ ᐸᓯᑦᑎᓯᒪᔪᓂᒃ ᓱᕈᓯᕐᓂᑦ ᖁᓄᔪᓐᓂᐊᖅᑕᒥᓂᕐᓂᑦ. ᑭᒃᑯᑐᐃᓐᓇᐃᑦ ᖁᓄᔪᓐᓂᐊᖅᑕᐅᓯᒪᓐᓂᖅᑲᑕ ᖃᐃᒍᓐᓇᖅᑐᓯ, ᐃᖅᑲᖅᑐᐃᕕᓕᕆᔨᒃᑯᓐᓂ ᐃᑲᔪᖅᑐᖅᑕᐅᓗᑎᓪᓗ ᑲᒪᒋᔭᐅᒐᔭᖅᑐᓯ.”
ᑭᖕ ᑭᒐᖅᑐᐃᔨᒃᑯᖏᑕ ᐱᔨᑦᑎᕋᖅᑎᖏᑦ ᑲᓇᑕᒥ ᑲᓇᑕᒥᐅᑕᐅᓪᓗᑎᑦ ᑲᑐᔾᔨᖃᑎᒌᑦ ᐃᖅᑲᖅᑐᐃᑎᑦᑎᕙᑦᑐᑦ ᐱᕋᔭᑦᑐᒥᓂᕐᓂᑦ ᒪᓕᑦᑐᒋᑦ ᒐᕙᒪᑐᖃᒃᑯᑦ ᑭᓪᓕᖏᓐᓂ ᐱᑦᑎᐊᖏᑦᑐᒥᓂᕐᓂᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ ᑐᕌᖓᓂᖅᓴᓂᑦ ᐃᓱᒫᓘᑎᖃᖅᑐᑎᑦ. ᑭᖕ ᑭᒡᒐᖅᑐᐃᔨᖏᑦ ᑲᒪᓲᖑᒻᒥᔪᑦ ᐃᖅᑲᖅᑐᐃᑎᑦᑎᓂᕐᒨᖓᔪᓄᑦ ᐅᖃᐅᔾᔨᒋᐊᖅᑎᐅᓪᓗᑎᑦ ᒪᓕᒐᕐᓂᑦ ᒪᓕᑦᑎᐊᖁᔨᓪᓗᑎᑦ ᑎᒥᐅᖃᑕᐅᔪᑦ ᑲᓇᑕᒥ ᓇᒥᑐᐃᓐᓇᖅ.
– 30 –
ᑐᑭᓯᒋᐊᕐᕕᒃ :
ᐱᕙᓪᓕᐊᔪᓕᕆᔩᑦ
613-954-7803
media@ppsc-sppc.gc.ca
www.ppsc-sppc.gc.ca
- Date modified: